Äffle ond Pferdle gan zamma fort. Pletzlich fängts zom rägna aa. No fragts Äffle 's Pferdle: "Du i glaub s rägnet, was machet mr no?" Pferdle: "Ha gange!" Äffle: "Wo ganga ma dann no?" Pferdle: "Ha da wos id rägnet, du Bachel!"
Äffle ond Pferdle essed zum erschta mole Schbageddi: Saids Pferdle zum Äffle: "'s nägschte mol kochsch abr ebbs kirzers!"
's Äffle schdaat vor dr Hauswand on haut a 5-Markstückle aufd Wand. Sagt s Pferdle: "Spinnscht du wol?" 's Äffle: "Ha i wollt au emal 's Geld auf da Putz haua."
's Äffle hoggd en 'rer Gneibe, 's Pferdle kommd als Kellnr. Äffle: "Koa mr hier ahschdendig essa?" Pferdle: "Dees will e dr grada han, sonschd schmeiß e de naus!"
Es Äffle sitscht vor am Täller mit Spätzle. Kommts Pferdle und frogt: "Willscht du die ganze Spätzle alloi uffessa?" Drauf sogts Äffle: "Ha noi, I ess no an Bolle Fleisch dzua."
's Äffle brobiard a haufa Schlissel an ra diar aus, abr koaner will so recht bassa. Do machds Pferdle d'diar uff ond moand, "'s isch doch offe, du Bachel".
Äffle: "Komm, mir gangat an da Neggr ond hengat a bißle d'Fiaß ens Wassr". Pferdle: "Noi, des derfa mr ned - jetzd, wo 's Wassr grad saubr isch".
Pferdle: "Du riachsch heid so komisch!" Äffle: "Ha ja, i han ao badet".
Äffle: "Was isch groß?" Pferdle: "Woiß it." Äffle: "En Elefant. - Ond was isch no greßer?" Pferdle: "woiß it." Äffle: "Schtuargert. Ond was isch iberhaupt am aller greschta?" Pferdle: "?" Äffle: "Lensa mit Schpätzla ond Soitawischtla!!!!!"
Pferdle: "Wie hoist 'Äffle' oigendlich uff englisch? " Äffle: "Ha -- 'mongele'."
Pferdle: "Warsch em Urlaub?" Äffle: "Noi, worom?" Pferdle: "Ha, du bisch so braun."
Pferdle: "Wenn I mit dem Affa verwischd werd, no benne mein Babbadggl los."
Pferdle: "Du solltescht zom Zehputza a Hoorbischt nemma." Äffle: "Wieso?" Pferdle: "Ha, weil da meh Hoor uff de Zeh hosch, als uffm Kopf!"
'S Pferdle sitzt im Reschdoraa ond will ebbes essa. No konnt dr Ober (des isch nadierlich 's Äffle). Pferdle : "Hoand sie Froschschenkl?" Äffle : "Noi, so lauf i emmer."
Äffle ond Pferdle sitzad oderm Baum. Äffle: "Was die Buche wohl saga däd wenn se schwätza kend?" Pferdle: "I ben a Eiche, du Bachel."
'S Äffle ond's Pferdle leigad uff dr Wies. No konnt an Haas aghopplad. Äffle: "Gug an Feldhaas." Dr Haas verschrickt ond schbrengt dr fo. Pferdle: "Noi, des isch an Angschthaas."
'S Äffle schdood voram Schbiegl ond kemmt sich seine drei Hoor. Pferdle: "Kasch dia id mol so na kemma das se leigad." Äffle: "Dia wellat standa bleiba no säad se mee."
Äffle: "Gell, Sahne muaß mr schlaga!?" Pferdle: "Jo, abr bloß, wenn se ned freiwillig uff da Kucha nuffgoht."
'S Äffle, 's Pferdle ond 's Schlabbinsche sitzed auf dr Schaislong, ond jedr hot an riesigr Wollebobbel vor sich. Se schdrigged wia verruggt. No saits Äffle: "Heid hemr abr widr a Wollust!"
'S Äffle schdot am a Baum mit ema Apfel uff'm Kopf, schießt 's Pferdle mit ema Pfeil direkt durch den Apfel, so daß der an da Baum na gnagelt ischd. Moinds Pferdle: "Wia beim Tell, gell?"
Schdot 's Äffle wiadr mit 'm Apfel uff'm Kopf do, ond 's Pferdle schiaßd (mit so ema Kinderpfeile mit Gommi vornedrah) dem Äffle diregt an da Schädel nah. Der schreid nadierlich obacha, onds Pferdle said: "Ha woischd -- 's ischd hald ga ned so oifach, dein Meggl von a ma Apfel zom onderscheida."
Pferdle: "Hosch du scho mol Liebeskummer ghet?" Äffle: "Noi, i eß bloß was i kenn!"
'S Pferdle liegt en dr Hengemadde, 's Äffle kommt mit em Saddel. Pferdle: "Nix do! Heit han i mein Ruhedag!"
